Dushanba kuni Filippin janubida 7,8 magnitudali kuchli zilzila yuz berdi. Mamlakat milliy falokatlar agentligi ma’lumotlariga ko‘ra, hodisa oqibatida kamida sakkiz kishi halok bo‘lgan. Mahalliy ommaviy axborot vositalari AQSh Geologiya xizmati (USGS)ga tayanib xabar berishicha, yer silkinishi binolarning qulashiga sabab bo‘lgan va mintaqada tsunami xavfi e’lon qilingan.
Fuqaro muhofazasi idorasi matbuot kotibi Diego Marianoning ma’lum qilishicha, halok bo‘lganlarning uch nafari Davao Occidental viloyatidan, uch nafari General Santos shahridan va ikki nafari South Cotabato viloyatidan.
Politsiya mayori Roland Catoburanning AFP agentligiga bildirishicha, hozircha rasmiy hisobotlarga kiritilmagan yana ikki kishi General Santos yaqinidagi Alabel munitsipalitetida qulagan devor ostida qolib vafot etgan.
AQSh Tinch okeani tsunami haqida ogohlantirish markazi ma’lumotlariga ko‘ra, Mindanao orolining Sarangani viloyati yaqinidagi dengizda sodir bo‘lgan kuchli zilziladan so‘ng, Filippinning ba’zi qirg‘oqlarida to‘lqin balandligi odatdagidan 3 metrdan (10 fut) oshishi mumkin.
Germaniya geofizika tadqiqotlari markazi (GFZ) zilzila Mindanao hududida, 10 km (6,2 milya) chuqurlikda yuz berganini va uning intensivligini 8,2 deb baholaganini ma’lum qildi. Epitsentr Filippinning Burias provinsiyasidan 24,7 kilometr (15,3 milya) g‘arb-janubiy g‘arbda joylashgan bo‘lib, uning chuqurligi 35 kilometr (22 milya) deb qayd etildi. Zilzila soat 7:37 da sodir bo‘lgan.
“Hozirroq yuqoriroq joyga ko‘chiling”
AQSh Geologiya xizmati (USGS) ma’lumotlariga ko‘ra, birinchi zilziladan taxminan ikki soat o‘tib, 6,1 magnitudali kuchli afshok (vafodiy tebranish) qayd etilgan.
Tinch okeani tsunami haqida ogohlantirish markazi yaqin uch soat ichida Filippin, Indoneziya, Palau, Tayvan va Papua-Yangi Gvineya qirg‘oqlariga tsunami to‘lqinlari yopirilishi mumkinligidan ogohlantirdi.
Filippin Fuqaro aviatsiyasi boshqarmasi zilzila va Phivolcs (Filippin vulqonshunoslik va seysmologiya instituti) tomonidan berilgan tsunami ogohlantirishi sababli General Santos shahridagi aeroport faoliyatini vaqtincha to‘xtatdi. Filippin va Indoneziya rasmiylari xavfli qirg‘oqbo‘yi hududlarda yashovchi aholini zudlik bilan balandroq joylarga ko‘chishga chaqirdi.
“Hozircha bir nafar qurbon va to‘rt nafar jarohatlanganlar haqida aniq ma’lumot bor. Bu faqat dastlabki ma’lumotlar,” — dedi General Santos shahar politsiyasi master-serjanti Robert Dagon AFPga. “Bir qancha binolar qulab tushdi. Ko‘plab binolarga zarar yetgan, biroq ayni paytda qutqaruv ishlari bilan band bo‘lganimiz sababli ularni aniq hisoblab chiqishning imkoni yo‘q”.
Filippin prezidenti Ferdinand Markos Mindanoning talofat ko‘rgan hududlarida maktablardagi darslarni to‘xtatdi va qirg‘oqbo‘yi aholisini zudlik bilan evakuatsiya bo‘lishga chaqirdi.
“Hozirroq yuqoriroq joyga ko‘chiling. Kutib o‘tirmang,” — dedi prezident. “Sizning hayotingiz ortda qolgan har qanday moddiy narsadan muhimroqdir”.
Indoneziya milliy falokatlar agentligi ham Shimoliy Sulavesi poytaxti Manado, Gorontalo viloyatining shimoliy hududlari va Sangihe orollari mutasaddilariga aholini tartibli ravishda zudlik bilan xavfsiz tepaliklarga evakuatsiya qilishni buyurdi.
Dunyoning tabiiy ofatlarga eng ko‘p moyil mamlakatlaridan biri bo‘lgan Filippin Tinch okeanidagi “Olov halqasi” bo‘ylab joylashgani sababli tez-tez zilzila va vulqon otilishlariga duchor bo‘ladi.
Yaponiya rasmiylari ham mamlakatning Tinch okeani qirg‘oqlari uchun alohida tsunami ogohlantirishini e’lon qildi. Mahalliy vaqt bilan soat 11:30 dan (GMT 02:30) boshlab turli hududlarga balandligi bir metrgacha (3,28 fut) bo‘lgan to‘lqinlar urilishi mumkinligi bildirildi. Kyodo axborot agentligining Yaponiya meteorologiya agentligiga tayanib xabar berishicha, maksimal balandligi bir metr bo‘lgan tsunami Miyako va Okinavadagi Yaeyama orollariga yetib borishi kutilmoqda.
