Filippinlik o‘t o‘chiruvchilar Maniladan mamlakat g‘arbidagi Palavan viloyatiga qatnov vaqtida yong‘in chiqqan paromga kirdi. Hodisa oqibatida besh kishi halok bo‘ldi, 80 dan ortiq kishi bedarak yo‘qoldi.

Chorshanba kuni kechasi boshlangan yong‘indan so‘ng kuchli tutun va yuqori harorat qutqaruv ishlarini kechiktirdi. Shu sababli guruhlar butunlay yonib ketgan kemaga bir kundan ko‘proq vaqt o‘tib, juma kuni kira oldi.

Filippin Sohil xavfsizligi yo‘lovchilar ro‘yxatida qayd etilgan ikki kishi aslida kemada bo‘lmaganini tasdiqladi. Shundan so‘ng bedarak yo‘qolganlar soni 86 nafardan 84 nafarga kamaytirildi. Jami 43 kishi qutqarildi.

Yo‘lovchilar ro‘yxatiga ko‘ra, paromda 117 nafar yo‘lovchi va 17 nafar ekipaj a’zosi bo‘lgan.

Sohil xavfsizligi hududga beshta kema va g‘avvoslarni yubordi. Chorshanba kuni kechasi boshlangan qidiruv ishlariga armiya qutqaruv qayiqlari, baliqchilar va xususiy dam olish maskanlari egalari ham ko‘mak bermoqda.

Sohil xavfsizligi matbuot kotibi, kontr-admiral Noemi Kayabyab hududga yanada katta kema yuborilishini bildirdi.

Yong‘inning kelib chiqish sababi hozircha noma’lum. Yong‘in boshlangan paytda parom Palavan shimolidagi mashhur sayyohlik markazi Koronga 20 soatdan ortiq davom etadigan safarining yakuniga yaqinlashgan edi.

Dengizchilik sanoati boshqarmasi — MARINA hodisadan omon qolganlarning ko‘rsatmalariga tayanib, yong‘in boshlanishidan oldin kema ichida ketma-ket ikkita portlash ovozi eshitilganini ma’lum qildi.

Sohil xavfsizligi ma’lumotlariga ko‘ra, 330 kishiga mo‘ljallangan paromda beshta mototsikl, bitta elektr avtomobili, bitta yuk ko‘targich va bitta pikap kabi turli yuklar ham bo‘lgan.

7 ming 600 dan ortiq oroldan iborat Filippinda paromlar muhim transport vositasi hisoblanadi. Millionlab odamlar viloyatlararo safarlarda dengiz transportidan foydalanadi.